مُپت ناهودگ چتور وشّ بیت مئے کِیرّینگ ترا
دیر نہ اِنت یک ساھتے ءِ گپّ اِنت ریپینگ ترا
منجلی جوشاں جنئے لُنٹاں چی ءَ سوچئے وتی
ھچ نہ بْراه ایت انچوکیں گپّے ءَ چنڈینگ ترا
چو کہ دَکنی ایں کروس ءَ چُرز تئی پاد آتکگ انت
چہ کَے ءَ کَشتگ، کَے ءَ داتگ چُشیں کینگ ترا
نی وتی رَدی ءَ یلہ دَے شِھم بے مردم بہ بے
دَمپ ءُ ساھتّ ءَ نہ بیت اِنت گونمن گِرّینگ ترا
تاب دات اَنت لُنٹ ءُ لونسا لونس بوتئے ٹیٹلک
زھر مگر شر چیز چٹّیناں بیا بنگ ترا
ٹوپ ترا لگّات باریں ماں سرءَ پنچاں جنئے
ھکّ اِنت گُٹّ ءُ ننگرے بندگ ءُ بُڈّینگ ترا
من چہ تو پونزایاں ناسرپد اَنگت سرپد نہ بئے
روچ شپ بنت تو نہ پھمئے بس اِنت پھمینگ ترا
تو دپ ء وت چومن ء بگْوشئے کہ ”سوچاں من ترا“
وھدہ اِنت واریناں سیر ءَ کُنچت ءُ بینگ ترا
شاہ ترا کشّات پاک بارت اِنت ترا اوچار کتاب!
ما وت گاریں، گار کنات اَنت تئی اِے جُمبینگ ترا