آه (پْرشتگیں دل ءِ توار)

ھمدلیں بْراتاں ءُ منی بیل ءُ ھمبلاں

چاردہ روچ ساری بوتگاں لیب ءُ گنگلاں

بَستگ اَت من پَھر پہ کلاتے ءَ مھکمیں

سار اِت اَت انچش دائم ءَ شادان ءُ گَلاں

واب ھیالے ھم چومنی ڈیلّ ءَ شِکّ نہ کُت

زُرت من ءَ وھد ءَ بے گُمانی گوں زمبلاں

لُکّ ءُ تبد سوچ اِیت موسم ءَ پُلّان ءَ بلے

گیمّرین اِیت زِیتّ تر لِوار وشبوئیں گُلاں

من نہ زانت بے واری من ءَ پْروش اِیت بے ریا

ماں دپ ءَ جور کنت اِنت منی شیر ءُ شکّلاں

ھچ وسی گپّے نہ اِنت منی، مُپت ءَ سر جناں

گار کتگ ھاکاں پَر چی ءَ پٹّاں ماں جَلاں

پھک کناں ارساں بند کناں اُپّاراں وتی

کہ گْوز اِیت دْرستانی سر ءَ اے جمبر شلاں

گم منی سکّ گْران اِنت نہ بیت آسان ھجبر ءَ

مرد ماں گْور گنداں کن اَنت گْرانیں مشکلاں