املّ دوشی سریگ ءُ پیلہ ءُ سر چادری آتکگ
تھاریں کُلّ ءَ رُکشوکیں سھیل ءِ دروری آتکگ
نہ بوتگ بِھ ماں اِمروز ءَ چہ من ساری اگاں زانئے
کہ واھگ گوں منی ھمراھی ءَ چیر اندری آتکگ
گمے چونیں من ءَ دات ئِے نزاناں، پمّنی نَزّ ءَ
تھاریں شپ ماں دریا ءَ پہ ھَور ءُ جمبری آتکگ
بزاں نوں ماہ رنگیں دزگْوھارانی ھبر گْوستگ
کہ دیوان ءُ سْرپاں مرچی کھیبانی پری آتکگ
پہ سر ھجبر نہ روت اِنت بے وسیں کوشست اُمیتانی
کہ مردم وت ماں امروز ءَ دو روچی بے سری آتکگ
اگاں ژند اِنت گُلیں ھانؔل مروچی اَے منی ھمبل
من چو یاتاں کسے واب ءُ ھیالاں اَندری آتکگ