بیا پَد ءَ شتکیں تلارانی دلاں دِرّاں کنیں
گرانبھائیں دوستی ءُ مھر ءَ پد ءَ ارزاں کنیں
تئی دوئیں گالاں منی ناسرپدیں دل گونجتگ
بیا پد ءَ گالانی ربّالو زری نوداں کنیں
مارا چہ راہ ءَ گِسر کرتگ اے بے راھیں سراں
اے دل ءِ ھوناں چہ سھریں مادنے رنداں کنیں
نی دل ءَ سَھڑیں کہ جوانیں روچ چماں اندر اَنت
زان پہ زان نندیں جگر بُرّیں گماں تالاں کنیں
راہ مئے بستگ اگاں کوہ ءُ تلار ءُ گریشگاں
گوں وتی سرپنجگاں شیری رَھے بُرّاں کنیں
میریانی پرشتگیں بان ءُ ربد مئے سنگر اَنت
چہ بدیں ھوناں سگارانی زھاں سوھاں کنیں
«کمبری» دَورے پد ءَ کارین ءُ ما جان پَھِلّ
مکھیں ماتانی مھر ءُ دوستی ءِ شیراں کنیں
ناروایاں پمئے گورگنداں کُتگ اومان پد ءَ
شکّلیں ارواہ ءُ گھگیریں سراں بیراں کنیں
چو گروک ءُ بیر ءُ نپت ءُ آسگورایں جمبر ءَ
دژمنانی زید ءُ میتاپیں لداں سوچاں کنیں
مان تر اَنت ھانل ءُ مھگل اگاں دیم ءَ مئے
منّتان اِش روریں بندیگ اِش وتی کَولاں کنیں
دور نہ اِنت منزل ھرار گنج ءُ ھزار نازیں سید
ھمبلاں زوریں چو کَور ءَ دورسریں رُمباں کنیں