بیگاہ کُتگ

زِردوں موجانی گُل ءِ واھگ ءَ بیراہ کُتگ

دگہ روچے ماں شوھاز ءَ دل ءِ بیگاہ کُتگ

شَھم اِتگ دوشی گروک ئیگ ءَ منی کل ءِ دپ ءَ

پد ءَ مرچی منی وابیں دل ئِے آگاہ کُتگ

مرگ ءِ زھری چہ تئی گْرانیں گماں باج نہ بارت

پہ ترا سدبر ءَ کولیگ وتی ساہ کُتگ

یک برے بْیا او منی ساہ ءُ نَپَس چاراں ترا

تئی بے گنجیں زھیراں من ءَ بے ساہ کتگ

پچ دْرھین اِیت گُل ءِ یات چہ دَشّیں واب ءَ

کیگد ءِ تْرانگ ءَ اِے دل وتی وابجاہ کتگ

مال ءُ مڈّی منی اِمروز ءَ ھمے یکّیں دِل اِنت

ھانؔل ءِ ھاتر ءَ دروانی دوار جاہ کُتگ

منزلوں دُور ءُ رھوں بْرھنگیں ڈنّانی میار

گلگے گْرانیں گمانی وتی ھمراہ کتگ