برے نہ بوتگیں

برے نہ بوتگیں کاراں پمن روا تو کن ئے

برے اِے آزگیں ٹپّاں دل ءِ دوا تو کن ئے

برو کہ شاہ ءِ میارئے تو اَے دل ءِ کاسد

نہ زاناں کُچّل ءُ ماجین ءَ چوں رَزا تو کن ئے

پہ دست ءُ دْروھی ءَ پیداک ئے وشّ آتک ئے بلے

من زاناں بے سریں کاراں وتی پدءَ تو کن ئے

پہ ھَیر مرچی چو بانور ءَ سمبھینتگ وت ءَ

چی ءَ گریبے ءِ ھون ءَ وتی سرءَ تو کن ئے

نہ چِنت گُل، منی اُپّارگاں چہ پولنگے

دمانے پمّن ءَ دیم ءَ اگاں درا تو کن ئے

منی نَپس! منی اَرواہ! ساہ منی یکّے

بگْوش کہ پہ وت ءَ کولیگ ئِے چُنت برءَ تو کن ئے

نہ زان ئے کہ منی بنّامی پہ تئی نام ءَ اِنت

کہ بے وسی ءِ منی گپّ ءَ ھرکس ءَ تو کن ئے

اے دست بندی ءُ پریات دْرست بیکار اَنت

کہ ھرچے پنت بدنت دل ترا ھما تو کن ئے

مہ بستیں دْریگتیں من پَھر پہ تئی کولاں

”نہ زانتگ من کہ گونمن چوشیں دگا تو کن ئے“

اِد ءَ وَ دْرست تئی گُنھگاریں ما، بلے اِے بگْوش

کہ جُست ءِ روچ ءَ میاریگ کَے کَے ءَ تو کن ئے

پہ گُل پری ءَ منی گْونڈیں دست رسں ھمیش اِنت

نی دیمترءَ پَمَن ھَرچے کن ئے ھدا تو کن ئے

مُریدی گلاں بدار دُربیان بھمنت اِنت

سیؔد دسے وتی ھانؔی ءِ ھاتر ءَ تو کن ئے