چُنت کِردار اَنت چُنت ءَ شرپ ءُ نام رسیت
اے کِشکانی پاداں چوں گْوربام رسیت
اے بازار ءِ کِسّہ، کِسّہ چے ساز اَنت
یکّیں تام ءَ دْرستاں بازیں تام رسیت
مئے پوشاکانی پُشت ءَ رنگیں دُنیایے
کیسگ دانکہ زاھر بنت تہ وام رسیت
بْیا اے چراگاں نوکیں شپے ءِ پاسے دئیں
ھاموشی ءِ کُنٹ ءَ تئی اوگام رسیت
تولگ پوشیت شیر ءِ پوست ءَ چے اَجب اِنت
اسپ ھَرے بیت، زین ءَ اوں پالام رسیت
مئے شاھیم ءِ آمود ءَ پُگ گیشّین اَنت
عقل ءِ سَنگ ءَ گیشتر کہ بادام رسیت
راست گُشئے تہ راستیں گپّ ءَ پُشت مہ کِنز
مولد گون اِنت واجہ پہ لیلام رسیت
تاکے بُزورئے، پُلّے بُزورئے، بوہ بہ چِن ئے
موسم مٹّیت پہ تو اسحاق ؔ ھزّام رسیت