عشق بازارے ءُ بازار ءَ مِران اَنت مردُم
چونیں اے کارے ، ھمے کار ءَ مِران اَنت مردُم
گْونگیں بالاداں اِد ءَ عُمرے نسیب ءَ نیست اِنت
مچکدگ گُنش نہ اِنت ھار ءَ مِران اَنت مردُم
سُپتگیں پونزاں پُلویے اگاں اومان بہ بیت
مُرت بانور کہ دِشتار ءَ مِران اَنت مردُم
دْرستیں راھانی سرا یکّیں چراگ اِنت روک اِنت
جِند ءِ پجّارگ ءَ پجّار ءَ مِران اَنت مردُم
کیسگاں ھالی ایں بِستار ءِ سبق در بُرتگ
آس بیت، آپ بیت تئی جار ءَ مِران اَنت مردُم
تو وتی سُہباں ، وتی بیگہاں نزّیک بکن
مئے سفر دُور اِنت ، مئے ٓ، پار ءَ مِران اَنت مردُم
مُچّی اَنت ، مُچّیاں لِلک وتی گُٹّ ءَ گار اِنت
مُچّیاں ایوکی ءِ غار ءَ مِران اَنت مردُم
سُہب اوشتاتہ کہ بیگاہ ءِ ندارگ گار اَنت
شُومکءِ رنجے ءَ بیمار ءَ مِران اَنت مردُم
ما اسحاقؔ زِندگی ءِ نام چیا زِند کُتگ
دست ءِ وار ءَ اَنت بلئے وار ءَ مِران اَنت مردُم