توامیں کِشک پشکپنت ،پدا اے گپّ ءُ گال بنت
نہال دْرچک بنت بلئے گوں ساھگاں نہال بنت
کروچ ءُ گونزلی ھمے شگنزّاں تاپ بُوتگ اَنت
تئی گُشتن ءَ اے مچکدگ پہ گُنشے ءَ زوال بنت
ھؤ مئے پشک ءِ دامُن ءَ غریبی ءِ نِشانے پِر
تئی واجہیءِ داگ دْرست ھؤ بلئے مثال بنت
اَموچک ریتکگیں تئی ، ھبر اِد ءَ ششیم بنت
دِل ءِ مئے واھگاں بِچار چتور بُرز بال بنت
زمین ءِ اے دِل ءَ منی اُمیت ءَ توم چنڈّ اِتگ
رُداَنت کاہ ءُ کلپِرُک بگند ھمے چنال بنت
اِسحاقؔ ساھگ ءَ وتی بچّیلے ءَ چہ گْوستگ ئے
تئی شعر لبزاں در کپنت بلوچ ءِ زِند ءِ ھال بنت