شپ ءِ پندول ءَ تئی، وھد ءِ،دو ٹکّا ماں نیست
اَرزِشے نیست بزاں برکتے لکّ ءَ ماں نیست
واب ءِ معنایے ءَ کرگُشک کلات ءَ رُستیں
انتزار اینچو کپیسّ ءِ ’’پد ءُ چکّ‘‘ ءَ ماں نیست
ما اد ءَ اتکگ ءُ جیڑیں کہ پدا واترّیں
آزمان! لوگ تئی گُڈّی تبکّ ءَ ماں نیست
سُہب ءُ بیگاہ ءِ ھمے لیب کدی آسر بیت
دوئیں پتّاھاں اِد ءَ بادشاہ،یکّا ماں نیست
رِتکگیں واباں منی گیچن یے ءَ پالائیت
چو نہ زانتیں کہ ھَوردگ منی ٹکّ ءَ ماں نیست
ماسگ ءَ ھال کُتگ،مُرگے ءَ آمین کُتگ
مئے لکیراں تئی قسمت گُڑا پکّا ماں نیست
ما اِراں کنداتگیں چمّاں بُلوٹیں اَرسے؟
وشّی یے رنج اِتگیں مئے دل ءِ ھکّ ءَ ماں نیست
زیب شعرانی تہا پازُل ءِ گالاں بْراھیت
بے ترا زیب یے دگہ مندؔ ءِ گوّکؔ ءَ ماں نیست
ما اسحاقؔ گاریں وتی کِشک ءَ کُجا شوھاز ایں
گُنگدام مئے وڑیں تئی ھلک ءِ چَوَکّ ءَ ماں نیست