دست بہ رَس اِیت دگہ دنیایے پہ تو اڈّ کناں
کوھاں سْریمّگ کناں نیلبومیں زِراں وڈّ کناں
یا کہ گوں وژدلی ءَ تئیگ ءَ شریدار باں، یا
انچوش وت باراں ترا ھم چہ گماں بڈّ کناں
وَش نیتکانی شگان تْرند اَنت بلے پہ تئیگی
ایر بَراں کُچّل ءُ ماجیناں دل ءِ ڈڈّ کناں
نہ من ءَ دلجمیں اولاک ءُ نہ آپ ءُ توشگ
منزلوں دُور اِنت مھلّئیگ ءَ چِن ءُ لَڈّ کناں
ھانؔل ءِ ھاتر ءَ چار گال پدءَ پِر بستگ
گال ءُ گپتار کُجا اَنچوش گڈّ ءُ وڈّ کناں