دْرواھی

اسپراں پِسّیٗ بْرادری باسکاں گوش کن اِت

بَسّ اِنت بے ساری گْونڈکیں سھتے ھوش کن اِت

ھمرِدیں گالاں ایمنی ءَ دلگوش کن اِت

شکّل ءُ شیراں کدّھے زرّیں نوش کن اِت

بستگیں زنگان ءَ دل ءِ مُشت ءُ موش کن اِت

پہ اَدارکّے اِے گمان ءَ روپوش کن اِت

کہ چُشیں سوب ھچ رھگْوزی مرد ءَ بھر نہ بیت

تانکہ شھدیں نُکّ ئِے چہ نادُوکاں زھر نہ بیت

دْراھیان اِتّاں من پرندوشیگیں شپ ءَ

چّموں پہ راہ ءَ ھانؔل ءِ نام ھار اَت دپ ءَ

دانکہ بانگْواہ ءُ روچ درا ءَ چہ سر شپ ءَ

بیتگاں لسّائیں ھیالانی در کپ ءَ

تاسپیں دیم پدرا نہ کُت دُنداری شِپ ءَ

کُلّ تھا ریں روژنا نہ کُت آ پُلّیں کْرپ ءَ

تنگھیں گوناب ءَ اَمُلّ ئیگ ءَ شھم نہ کُت

بھت ءِ سْیاھی ءُ اِے تھاری کُل ءِ نہ شُت

مُدّتے بیت کہ من پہ اِے کِشک ءَ کپتگاں

یک دمانے ھم چہ گُل ءَ من نہ شمشتگان

ھانؔل ءِ دْرواھی ءَ دو سال کُبلیں نشتگاں

چہ دلی دوست ءُ ھمبل ءُ بیلاں سستگاں

زندگ ءَ سجیگّیں کباب ئیگ ءَ بْرتکگاں

پہ گَمی ھاراں بانڈمی دیمپان بوتگاں

گم جگر بُرّیں سگّ اِت اَنت لال ءِ ھاتر ءَ

زْیان مہ گِندات اِنت پہ وتی لک راجیں سر ءَ

شات کُت اَنت جوریں دژمنانی پہ وت ھبر

پہ اُمیت ءَ کہ نیک بیت روچے تئی نِزر

کُرتگ اِت زانتکاری من ءَ وار ءُ در پہ در

وت پد ءَ ھال ءِ پُرسگ ءَ دیم داتگ نَپَر

گوں کَساب ءَ اِنت کارچ آزگ اِنت بے ڈول ءَ جگر

بے کہ اوپار ءَ پمّن ءَ نیست اِنت ھچّ در

دل پہ دنتاں ھم دائمی ءَ دارگ نہ بیت

بُرتگیں بند پہ چَنک ءُ لاکوٹ بندگ نہ بیت

تو پَرے مھرنگاں مہ بند پَھر ءَ ھچ بر ءَ

آسر اِے کاڑانی پَرے ڈول ءَ اِنت گُڈّسر ءَ

تولگ ءُ روباھی رسین اَنت شیرء نر ءَ

آزگیں ٹپّان ءَ پِردار اَنت اَنگر ءَ

اِے کَڑیاں چہ، من اگاں زِھتاں چہ بر ءَ

پہ رَھے پِرّیناں وتی بے راھیں سر ءَ

جُھدوں پہ سر روت ءُ بہ بیت جْوانیں دست رسے

گوں دلی بیلاں ساز کناں بْراتی مجلسے

سد ھزاری گنجے شما بْراتاں وَژدل اِت

چندے کہ دُور اِت چندے ماں دیوان ءَ جم اِت

شھد زبانان ءُ دُربیاناں داد دَے اِت

ھاتروں وش بیت گر منی گالاں گوش کن اِت

پہ دِل اِش گوش دار اِت پد ءَ شرّ اِش در بر اِت

بلکیں بیت روچے پمّنی گُپتاراں زَر اِت

کوڑئیں دنیا چہ منی دیم ءَ ایر شِپ اِیت

شکّلیں ساھوں ژندیں سُندرُک ءَ چہ زِہ اِیت