گپّ ءُ تْراں کُت

من رَدکپت ءُ گُل ءَ گوں گپّ ءُ تْراں کُت

سروں گَھ گپتگیں مُپت ءَ زیاں کُت

کہ وابوں نئیت ترا چمّے بگنداں

چہ کارے آسکوابیں دیدگاں کُت

نہ ھونے تئی من ءَ گون اَت نہ بیرے

چی ءَ کولیگ ءُ ندرْ ءُ جی ءُ جاں کُت

من نیکیں بھت گوں دستاں دتیگاں

چو تئی شِنگیں زبادیں مھپراں کُت

مدام چو جُو سری سَول ءَ بباتئے

من ءَ کوھیں گماں تئیگاں کماں کُت

نئیت شَش ماہ اِنت دُرّیں دْراھباتے

من ءَ دلْپروش پُلّیں ھَمبلاں کُت

دوبر تیر وارتگیں اے آزگیں ٹپّ

شگان ءُ تژناں آس ءُ انگراں کُت

من زاناں کَیت گوں دل پْروشیں جواب ءَ

کہ رَد کپت ءُ وتی کاسد رواں کُت

گُل ءِ اِشک ءَ، گوں بْریجوکیں شِگاناں

من ءَ آماچ دوست ءُ دُژمناں کُت

اُمیت ءَ سارت بوئیں کھربا ءِ

ھَمُک شپ کُلّ گوں مسک ءُ اَمبراں کُت

پدر د اِنت مرگ کہ اِشک ءَ گُل ئیگ ءَ

من ءَ ایر جیگ جگر بُرّیں گماں کُت

بہ پھریز اِت وت ءَ کہ اِشک ءِ راہ ءَ

ھمک کسّ ءَ وتی بُن بار گْراں کُت

من اِشک ءَ ھانؔل ءِ چوشیؔھ مرید ءَ

چہ دْرستیں تھلیاں تِنگے گِراں کت

چہ شاھی دپتراں گْرانیں گمانی

اَشارتّے ماں نکشیں کاگداں کت