تْرانگ ءَ گْوستگیں دَورانی مہ پِرّین اِت مناں
دلوں پہ ڈولے نزور اِنت کہ سگّ اِت نہ کناں
جَھل جتگ پْروشتگ من ءَ کُوڑئیں دنیا ءِ گَماں
ناگُمانی من ءَ ایر جیگ کُٹگ کھریں دستاں
شُما اگاں وشّ نہ بئت من چرے دنیا ءَ رواں
آزگیں ٹپّاں منی پرچا کُدین اِت بیلاں
من شریدار نہ لوٹاں وتی درد ءُ دوراں
وژدلیں بیلاں دل ءِ ھاتر ءَ دِل سِند نہ کناں
یک دمانے بہ تْرہ اِیت من کسی زنگ ءَ نہ جناں
گموں اِیش اِنت کہ گوں کَے گماں تالاں بکناں
گوں وتی ھُکئیں نالان ءُ مزاری دستاں
من ءَ آدْرو کتگ دنیا ءِ گمانی بوراں
روھوی روچ ءِ جگر آپ کنوکیں زْرمبشت
ماتی آ تنگھیں بچّانی دل ءَ ایر نہ نِشت
زانگ اِش گار نہ بوت ءُ نہ شُت چمّانی گِرشت
پہ مڑا آتک ءُ شُت اَنت واجھی نام گُڈّچَہ وت اِشت
مِنّت وار اِنت چُشیں چوٹ بروتانی بھشت
پہ وت اِش شات نہ کُرت اَنت دو روچی گِل ءُ ھِشت
دْرتکگ اَنت رنگیئیں گُل میھاں سگار زَرمُشتیں
پُر چَہ زنگ اَنت تلار بُرّیں دپ اِش ھون تنگیں
شام چِناکاں کُت اَنت بندانی چَکن پُر نکشیں
اے تلاریں سِپر چو نان پچیں تین اَنت جُھلیں
نی دپ ءُ آپ نہ بیت جنگی بٹالاں بگُشیں
کِسھّاں زھم جنیں سر پنجگ ءُ باسکانی کنیں
ھانؔل ءِ یات دل ءِ آزگیں ٹپّاں چونڈ اِیت
دل کُد اِیت درد ماں ھڈّانی تہ ءَ ایر کپ اِیت
پہ منی ریز اِتگیں ساہ ءَ گم ءِ کوہ پْرش اِیت
دِیر ماں ژِیمبّ ءُ گراں سْیاھی یے پمّن کند اِیت
دیدگاں چہ منی یک دور سریں کورے رُمب اِیت
سْیاھیں جمبر، نی گمانی پہ دمانے بُرّ اِیت
چوں کناں من اگاں اِے نیلّگیں ھور ءَ گْرند اِت
کَے ءَ دیمپاں کناں بگْوش اِت اگاں ھار ءَ مَلّ اِت
ھون ءَ ناھکّ ءَ منی پرچا وتی بَڈّ ءَ کن اِت
کَے منی مونسی ءَ کنت اگاں ساھوں نہ سِست
پونز ءِ باھوٹاں شمئے پمّنی گالاں مَہ زَر اِت
دلوں نوکی تْرہ اِتگ پمّن ءَ بزّگ بکن اِت