میزّاں میزّاں ءَ

میزّاں میزّاں ءَ منی واب ءُ ھیالاں چہ درا

دل چہ بنداں تئی اَندوہ ءُ گماں چو سِستگ

کہ من دِل گْوشتگ بلے زیادگیں دْروگے بستگ

ایشی ءِ اُپّارگاں سالے ءُ دوشش ماہ گْوستگ

یک دمانے بیت کہ دردانی دوار جاہ تْرہ اِتگ

مِنّت واراں تئی ایشی ءَ نی مہ ٹوھین پہ ھُدا

میزّاں میزّاں ءَ منی واب ءُ ھیالاں چہ درا

وتی ملگوراں مہ شنگین من ءَ بے سار مکن

شھد ءُ وش زیملیں گالاں گوں وتی گار مکن

واھگ ءُ دوستی ءَ مارا پد ءَ بیگار مکن

چو من ءَ تْرند مچار ءُ دل ءَ واھدار مکن

دست بنداں کہ چما راہ ءَ برو تّر پدا

میزّاں میزّاں ءَ منی واب ءُ ھیالاں چہ درا

دوتکگ گونڈلاں دل ھوش ءُ ھیلانی بزاں

تیر باراں کُتگ مارتیناں شگانانی مناں

مُدّتے پتکگ جگر انگر ءُ سُھریں آساں

ھُشک بات دژمن ءِ دست ایر اَت تئی زان سراں

دْرست تئی ھمراہ اَنت نی ھجبر منی دنیا ءَ میا

میزّاں میزّاں ءَ منی واب ءُ ھیالاں چہ درا

بے ریائیں تئی آ کڈھیں چمّانی کمان

ٹِکّ ئِے بست اَت پمنی سینگ ءَ بے وھد ءُ گمان

تْرانگ ءَ گْوستگیں پرّین اَنت من ءَ سھت ءُ دمان

تا ابد گار نہ بنت کارِیگیں ٹپّانی نشان

دیدگاں آسکی مہ شان دیدگی سوگند اِنت ترا

میزّاں میزّاں ءَ منی واب ءُ ھیالاں چہ درا

چو منی بَھت ئیگ ءَ شپ پہ کسے ءَ سْیاہ مبات

کسی بالاد ءَ گُمانی چُشیں مشکل مہ کپات

گوں تو ھانؔل منی اِے یکّیں دُوا ھمراہ بات

وژدلیں کُلّ تئی دلواھیں مُراداں گِندات

زیر وتی داتگیں سوگاتاں پہ وشّی ءُ رَزا

میزّاں میزّاں ءَ منی واب ءُ ھیالاں چہ درا